Tashabbuskorlik va tashkilotchilik inson faoliyatining ikki qanoti. Ana shu sifatlarga ega boʻlgan insonlar doimo eʼtiborga sazovor, tahsinga loyiq. Oʻziga yuklangan vazifani sharaf bilan ado etish ham fidoyilikni talab etadi. Zahmat chekmaguncha rahmat eshitilmas degan hikmat bejiz aytilmagan. Oʻz kasbini sevish, yaqinlariga, kasbdoshlariga muhabbatli va muruvvatli boʻlish uni el-yurti, mehnat jamoasi, mahallasi, oilasi oldida katta nufuzga ega qilgani sir emas. Gap 1981 yildan buyon institutimizda samarali faoliyat yuritib kelayotgan Abduraupov Ramz Rasuljanovich haqida. Ular 19 dekabr kuni oʻzlarining muborak 60 yoshini qarshiladilar.

Abduraupov Ramz Rasuljanovich 1983-1986 yillarda Sankt-Peterburg davlat politexnika universiteti aspiranturasida tahsil olgan. Institutda 15 yil davomida “Oʻquv-metodika boʻlimi” boshligʻi lavozimida ishlagan. U 2017 yildan hozirgi paytgacha Taʼlim sifatini nazorat qilish boʻlimi boshligʻi lavozimida ishlab kelmoqda. U Ph.D., dotsent.

R.R. Abduraupov - koʻpgina ilmiy va oʻquv-uslubiy anjumanlarda ishtirok etgan va 30 ga yaqin maqolalar chop etgan. Ikkita ixtiro muallifi. U Oʻzbekiston Respublikasi Agrosanoat Toshkent viloyati kasaba uyushmasi tomonidan Faxriy yorliq bilan hamda Oʻzbekiston Respublikasi Prezidentining 2001 yil 18 iyuldagi Farmoniga asosan taʼsis etilgan “Oʻzbekiston mustaqilligining 10 yilligi esdalik nishoni” bilan taqdirlangan. Suv xoʻjaligi aʼlochisi. U har ishda tashabbuskor, jurʼatli, toʻgʻri soʻz, maʼnaviy yetuk, oʻz hamkasablariga nisbatan doimo mehribon va gʻamxoʻr.

Hurmatli Ramz Rasuljanovich!

El-yurt hurmatini meros qilib boʻlmaydi. Unga faqat umr boʻyi halol, fidokorona mehnat qilib, yonib yashagan kishilargina erishadi. Sizni mana shunday kishilar toifasidan ekanligingizdan butun jamoamiz va doʻst-u birodarlaringiz, yaqinlaringiz faxrlanadi. Sizga tangridan uzoq umr, sihat-salomatlik va mamlakatimiz ravnaqi yoʻlida olib borayotgan kelajak faoliyatingizda kuch-quvvat va ulkan zafarlar tilaymiz!

Sizga samimiy hurmat va ehtirom bilan Toshkent irrigatsiya va qishoq xoʻjaligini mexanizatsiyalash muhandislari instituti jamoasi nomidan Institut Matbuot kotibi Rahimboy Jumaniyozov