Yunusobod tumani 53 sonli o‘rta maktabda 9 may umumxalq bayrami – Xotira va Qadrlash kuni munosabati bilan Ikkinchi jahon urushida hamda mustaqillik yillarida xizmat burchini bajarish chog‘ida halok bo‘lgan harbiy xizmatchilar va huquqni muhofaza qilish organlari xodimlarining xotirasini yod etish hamda fashizm ustidan qozonilgan g‘alabaning 74 yilligini nishonlash maqsadida 53 - maktab ma’muriyati hamda Toshkent irrigatsiya va qishloq xo‘jaligini mexanizatsiyalash muhandislari instituti harbiy kafedrasi hamkorligida «XOTIRA MUQADDAS-XOTIRA SHARAF» mavzusida tadbir tashkil etishdi.
Tadbirda O‘zbekiston Milliy tiklanish partiyasi Yunusobod tumani deputati Musaev Ulug‘bek Yo‘ldoshevich, «Anorzor» «Husnobod» mahalla fuqarolar yig‘ini oqsoqollari, Toshkent irrigatsiya va qishloq xo‘jaligini mexanizatsiyalash muhandislari instituti harbiy kafedra professor o‘qituvchilari va talabalari, 53 - maktab o‘quvchilari hamda o‘quvchilarning ota-onalari ishtirok etishdi. Tadbirni 53 - sonli maktab direktori Xudoyorova Firuza Mirkamilovna kirish so‘zi bilan ochib berdi. Shundan so‘ng, deputat Musaev Ulug‘bek Yo‘ldoshevich tadbir ishtirokchilarini bayram bilan tabrikladi. Mahalla oqsoqollari so‘zga chiqib urush davridagi qiyinchiliklar va ularni mardonavor yengib o‘tgan vatandoshlarimizni xotirlashdi.
Harbiy kafedra katta o‘qituvchisi Ergashev Xaydar Ikramovich mustaqillik yillarida xizmat burchini bajarish chog‘ida halok bo‘lgan harbiy xizmatchilar va huquqni muhofaza qilish organlari xodimlarini xotirlab nutq so‘zladi. Tadbirning badiiy qismida maktab o‘quvchilari tomonidan Ikkinchi jahon urushini aks ettiruvchi kichik sahna ko‘rinishlari, maktabda sportning «Taekvando» turi bo‘yicha tashkil etilgan to‘garak a’zolarining ko‘rgazmali chiqishlari, ayniqsa harbiy kafedra talabalari tomonidan qo‘l jangi elementlaridan tashkil topgan ko‘rgazmali chiqishi namoyish etilishi barcha tadbir ishtirokchilari tomonidan qizg‘in kutib olindi.
Toshkent irrigatsiya va qishloq xo‘jaligini mexanizatsiyalash muxandislari instituti harbiy kafedrasi boshlig‘I R. Minlishev axboroti
Institut matbuot kotibi Rahimboy Jumaniyozov