TIQXMMIda vatandosh xorijiy olim va mutaxassis ishtirokida “Atrof muhit va suv resurslarini boshqarish hamda monitoring qilishda matematik modellashtirish”ga bagʻishlangan ilmiy seminar tashkil etildi
Vatandoshlar bilan hamkorlik qilishning uzoq muddatli va mustahkam tizimini yaratish hamda 2017–2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasida belgilangan vazifalarni izchil amalga oshirish maqsadida 2019-yilning 26-27-iyul kunlarida Toshkent irrigatsiya va qishloq xoʻjaligini mexanizatsiyalash muhandislari institutida vatandoshlar - Germaniyaning Gumboltd universiteti professori, Abror Gʻofurov, Moskva davlat universiteti (MDU) ilmiy izlanuvchisi Ildar Muxamedjanovlar tomonidan doktorantlar va tadqiqotchilar uchun ilmiy seminar tashkil etildi.
Ilmiy seminar atrof-muhit va suv resurslarini boshqarish hamda monitoring qilishda matematik modellashtirishga bagʻishlangan boʻlib, unda atrof-muhitni modellashtirish jarayoni bilan tanishish, masofaviy zondlash asosida monitoring, statistik dasturlash (RStudio) bilan atrof-muhitning oddiy modellarini ishlab chiqish, gidrologik modellashtirish, masofaviy zondlash maʼlumotlarini qayta ishlashda qoʻllaniladigan zamonaviy yondoshuvlar va olingan natijalarni tahlil qilishga doir yangi bilimlar doktorantlar va tadqiqotchilar tomonidan oʻzlashtirildi. Seminarning ikkinchi kunida har bir ishtirokchi tomonidan amaliy masalalar yechib koʻrilib, yuqorida nomlari keltirilgan modellashtirish jarayonlarini amaliy masalalarga qoʻllash boʻyicha koʻnikmalar shakllanishiga erishildi.
Shuningdek, ilmiy seminar davomida MDU professori, Rossiya fanlar akademiyasining Kosmik tadqiqotlar instituti direktorining oʻrinbosari Lupyan Yevgeniy Arkadevich bilan onlayn tarzda muloqot tashkil etilib, uning tomonidan kelgusida hamkorlik jarayonlarini jadallashtirish, TIQXMMI talaba va doktorantlarini tegishli sohalar boʻyicha Moskva davlat universitetida amaliyot va stajirovka oʻtash imkoniyatlarini yaratib berish takliflari berildi.
Institut rahbariyati tomonidan ilmiy seminarni tashkillashtirish va oʻtkazishda faollik koʻrsatgan vatandoshlarimiz - Germaniyaning Gumboltd universiteti professori, Abror Gʻofurov, Moskva davlat universiteti ilmiy izlanuvchisi Ildar Muxamedjanov hamda hamkor Rossiyalik olim Lupyan Yevgeniy Arkadevichlarga minnatdorchilik bildirildi.
Ilmiy - tadqiqotlar, innovatsiyalar va ilmiy -pedagog kadrlar tayyorlash boʻlimi xodimlari O.Abdisamatov, N.Shaymanovlar axboroti