Michigan universiteti talabalari tashrifi kutilmoqda
Xalqaro hamkorlik boʼlimi boshligʼi Sh.Raxmonov Michigan universitetining Yevropa va Yevroosiyo boʼlimi bilan hamkorlikda 2021-yildan boshlab oʼzaro talabalar almashinuvini yoʼlga qoʼyish boʼyicha kelishib olinganligini aytdi. Michigan universitetining yer yoki suv resurslarini boshqarish yoʼnalishda tahsil olayotgan talabasi TIQXMMIga 1 oylik stajirovka (internship)ga kelishi mumkin. Qoʼshimcha ravishda oʼzbek yoki rus tilini oʼrganish va Oʼzbekistonning tarixiy shaharlariga sayohat qilish uchun sharoitlar yaratiladi. 2021-yilda pandemiya sababli, Michigan universiteti talabasining stajirovkasi virtual (onlayn) tarzda amalga oshiriladi. Yevropa va Yevroosiyo boʼlimi xodimi Birgitta Koxler bilan onlayn uchrashuvda bir yilda bir marotaba Vayzer (Weiser fellowhship) dasturi orqali Michigan universitetiga TIQXMMI professor-oʼqituvchisini 1 oylik ilmiy stajirovkaga yuborish uchun kelishib olindi. Safar bilan bogʼliq xarajatlar Michigan universiteti tomonidan qoplanadi. Maʼlumot uchun: Michigan universiteti (University of Michigan) АQShning yetakchi universitetlaridan biri boʼlib, QS xalqaro universitetlar reytingida 24 oʼrinni egallagan. Unda oʼrtacha 46 000 nafar talaba tahsil oladi. Michigan universiteti Ilmiy tadqiqot universitetlar ichida АQShda yetakchi hisoblanadi.
TIQXMMI matbuot xizmati