Ёзги ўқув –дала амалиёти
Гидрология ва Мелиоратив гидрогеология мутахассислиги бўйича таълим олаётган II курс талабаларининг "Гидрометрия", "Гидрогеология" фанларидан аудиторияда олган назарий билимларини мустаҳкамлаш, уларни дала шароитида бажариладиган ишлар билан таништириш ва амалда ўргатиш мақсадида ТИҚХММИ нинг Қорасувдаги Найман сув тақсимлаш иншооти ҳудудида 2 ҳафталик ёзги ўқув-дала амалиёти режалаштирилган. Ушбу амалиётда бўлажак гидрологлар ва гидрогеологлар бажарган гидрогеологик ва гидрометрик ишлар маълум кетма-кетликда амалга оширилди. Жумладан, сув сатҳини кузатиш, чуқурликларни ўлчаш ишлари, сувнинг оқиш тезлигини ўлчаш, сув сарфини ўлчаш ва уни ҳисоблаш, дарё оқимининг миқдор кўрсаткичларини аниқлаш, ер ости сувларининг кимёвий таркибини ва истеъмолга яроқли ёки яроқли эмаслигини аниқлаш, ер ости сувларининг ётиш чуқурликларини аниқлаш, сув сатҳини кузатиш ишлари амалга оширилди.
Ёзги ўқув-дала амалиётини жараёнида институтимиз рахбарияти томонидан талабаларга бир қанча қулай шарт-шароит яратиб берилди. Жумладан, талабаларнинг бўш вақтларини самарали ташкил этиш ва уларни жисмонан чиниқтириш мақсадида сунъий сув ҳавзаси ташкил этилганлиги бунинг яққол мисолидир. Шунингдек, талабалар маданий ҳордиқ олишлари учун етарлича шарт-шароит яратиб бераётган ва уларни қизиқтирган машғулотларни ташкил қилишда амалий ёрдам кўрсатаётган "Гидрология ва Гидрогеология" кафедра мудири Д.В.Назаралиев ва "Гидромелиорация" факультет декани А. Фатхуллаевга кафедра профессор-ўқитувчилари ва талабалар номидан ўз миннатдорчилигимизни билдирамиз.
Ўйлаймизки, бундай дала-тажриба ишларида талабаларимиз келажакда ишлаб чиқариш жараёнида ўзларининг эгаллаган билим ва кўникмаларини амалда иккиланишсиз қўллай олади. Шу билан бир қаторда бу жамоанинг аҳиллиги, бир-бирига бўлган муносабати, уларни институт олдидаги масъулиятидан келиб чиққан ҳолда, булар келажакда ҳар қандай ҳолатда ҳам институтимиз шаънини ҳимоя қила оладиган даражада етук мутахассислар бўлиб чиқади деб ўйлаймиз.
Қ.Ш.Эшқуватов ахбороти
Институт матбуот котиби Раҳимбой Жуманиёзов